डॉ. स्वर्ण लता भोजपुरी बाल गीत पर शोध कइले बाड़ी। भोजपुरी कविता आ आलेख के रचना लगातार कर रहल बाड़ी उनकर कुछ कविता । पता कृष्णापुरी, चुटिया, राँची, झारखंड
हाइकु
नारी जीवन परजीवी सदा से ना केहू सुने।
बापो अँगना दू रंग सबकुछ लागे पराया।
बिटिया आजो कोखे मरात बाड़ी बापे दुश्मन।
नदी आ नारी उठा पटक भरल जिनिगी राहा
सास ननद कहाँ आजो बुझेली कनिया मन।
मन कुंठित इक्कीसवी सदी में नारी बेचारी ।
आस के पक्षी अंतर में उड़ेला बहरी आग।
बेटी करम नाही कबहूं सुख काहे विधाता।
विटिया आज खेत से सीमा तक ऊँचा उड़ान।
आधी आबादी अब छुईमुई ना कथा से कंथा
घर बाहर श्मशानो ना बाचल आज के बेटा।
इज्जत रखे दूनो कुल गौरव
आज के बेटी।
नेह प्रतीक घर बने मंदिर नारी से आजा
तोहे प्रणाम कोखिया में करेलू वंश निर्माण।
ढाई आखर धरम आ मरम के जिनिगी सार ।
प्रेम प्रतिमा नख से शिख तक नारी स्वरूपा
आजाद कब होखब?
ई हमार ना आधी आबादी के सवाल हS आजाद कब होखब? काहे ना भेंटाइल ? हमरा आजादी स्वतंत्रता के पचहत्तर बरिस बादो ई सवाल जेहन में कुलांच मारत रहेला, कारण हम का कहीं पुरुष प्रधान समाज विश्वास ना करी ऊ अपने सुनेला नारी स्वर ना सुने, बाकि सांच सांच होला जे सभे देखता नारी आ दलित के हाल केकरो से छुपल नइखे समाज में।
कुछ दोष हमरो कुछ समाज के विधातो कम दोषी ना, जे भइल से भइल अब हमार चुप्पी टूटल बा समाज बहिर मत बनो दे देवे खुद ही आजादी ना तऽ छीन लेब आजादी अपना हक के।